عجايب في عيون الزمان

الا يالله المـــعبود يالــــــواحد الخــلاق

رفيع الجلال اللي جــــعل قبلتـــه مكه

اذا فتح باب وصــك باب وراه ارزاق

ولا احدٍ عرف من يفتح الباب ويصكه

عليك أمرها يارب يالمعــــطي الرزاق

وعلينا الصبر مادام الاوضــاع مرتبكه

صحيح الفضا واسع ولكن بعيني ضاق

وعيني من اللي شافته صـــابها حكــه

تشوف العيون من العجب والعيون حداق

عجايب سنينٍ مابقى بإثمــها ضحــكــه

عجايــب تشــــوف الواسطه تبني البواق

وعجايب تشوف المرتشي مامعه فكـــه

عجايب كثير الحسد والزور سوقه فاق

وكفوف الردى في كفة بليس مشتبكه

وعجايب تشوف الغيــــم ماناض له براق

وظروف البسيطه صارت احوالها دركه

فلا ياضميري واعرف الصــبر ماينطاق

تصبر وتظفر لو مشيت آخــر الســكه

حذاري تقول تعبت وأمر السـنين إرهاق

ولا تندب حظوظك وتجلس على الدكه

إذا الشمس غابت بأمر ربي يجيك اشراق

وما بين كاف ونون لا تاخذك شكــه

فعلـــــى الله تـوكل ربنا الواحد الخلاق

رفيع الجلال اللي جعل قبلــته مكــــه